مواطن : كل سنه وانت طيب دستور افندم .
الدستور : وانت بخير .
مواطن : شلونك دستورنا اشوفك شيبت طلعلك شيب .
الدستور : والله حالي زفت و ما تسر لا عدو ولا صديق وما خليتو فيني اعصاب شيبت من وراكم .
مواطن : افا ليش منو اللي مزعلك وشنو اللي مزعلك دستورنا ؟ ..
الدستور : قولي منو اللي ما زعلني منو اللي ما ضربني بالحيط منو اللي ما تجاهلني منو و منو و منو ... !
مواطن : اف اف اف شدعوا ليش تحسسني ان اللي يتعاملون معاك مو بشر ما يحترمونك ؟
الدستور : خلها على الله ، اهي لو راده على المواطن الفقير جان يهون بس عندك اللي يقسم ويخون هذي الطامه الكبرى !
مواطن : دستور تعال اقعد وريح ، وقولي وفضفضلي ادري فيك حجي قوله وريح اعصابك ..
الدستور : يبا ما خلو فيني انتهاكات ما خلو فيني تكسير قوانين ما خلو فيني ضرب فبعض وضرب في الوحدة الوطنية .
مواطن : انزين هذيل اللي تتحجى عنهم ناس مواطنين عاديين ولا ناس واصله ؟
الدستور : مو قتلك المواطن الفقير ما عليه شرهه ، دام النائب واللي اعلى منه ما يلتزم ولا يحترم القوانين الدستورية ..
مواطن : انزين يا دستورنا يمكن الناس تغيرت وانت اللي ما تغيرت صارلك 49 سنه !!!؟
الدستور : يبا انا غيرني عدلني سوني دشداشة على مقاسك ما عندي مشكلة بس امش على قوانيني اللي اقسمت عليها !
مواطن : يعني انت مع اللي يقولون نبي نغير فيك ونعدل فيك شوي ؟
الدستور : يبا من قالك انا قرآن ! اي عدلني بس حط فبالك هالديرة الطيبة وحط فبالك ان اي تعديل يمكن يجر وراه تعديلات مو خبرك اللي عندنا مع الهبه وكلٍ يركض ورا مصلحته ومصلحت معزبه !!
مواطن : تصدق معاك حق ، اليوم في كلمة يقولونها بعض الناس اللي يدافعون عنك "إلا الدستور" وهم نفسهم ما يلتزمون فيك وبموادك الدستورية ويستغلون بعض مثالبك القانونية !!
الدستور : هذيل كلهم يتبعون مصالحهم و ما همهم لا دستور ولا قوانين ، و ينادون بإسم الديمقراطية والحرية وهم نفسهم ما يستحملون اي انتقاد او هجوم ! عيل وين الحرية اللي تنادون فيها !!
مواطن : الله يخليك ذخر لنا يا دستورنا ، والله لو مو الله اللي حافظنا ثم انت جان الديرة هذي الله بالخيـــــر ! .
الدستور : والله يحفظ هالديرة اللي يلعب فيها كل من كان ولا اكو احد يطبق القانون عليهم .
مواطن : انزين اخر نقطة وبنهي نقاشي معاك واخليك تروح ترتاح ، يعني انت راضي انهم يعدلون فيك شوي ؟ اقصد يطولون شعرك ويقصرون "جمك" ؟
الدستور : تبي الصراحة اخاف اقولك اي نعم خل يعدلوني ، يقولون عني مزدوج ولا "انبطاحي" ... !
