السبت، 18 أبريل 2009

فزعة عيال لكويت


هي الفزعه وهي الرغبه الشبابيه الوطنيه القويه !!
لان ارادة عيال الكويت من شباب وبنات ومن سياسيين واكاديميين كانت اصلاحيه اكثر من نواب الامه ، لان نواب الامه يخافون من مواجهة الشارع ، يخافون من ضعف فرص الفوز في الانتخابات في الدوائر الخمس ، ما فكرو ان الدوائر الخمس راح تقلل من الفساد المستشري في 25 دائره والان تقلص الى دائرة وحده اهي اللي عليها العين وفاحت ريحتها على قولتهم .
من النواب اللي يجب علي ذكر اسمهم عشان ما ابخس حقهم الوطني والشجاع وتكاتفهم ونصرتهم للشارع الاصلاحي الكويتي هو النائب العم احمد السعدون والنائب محمد الصقر وعلي الراشد والنواب السابقين مشاري العصيمي ومشاري العنجري ..
شباب الكويت عندهم الاراده واقسم بالله الكريم ان شباب الكويت اذا ارادو شيء يسوونه يعني يسوونه بتكاتفهم مع خواتهم بنات الكويت ، نبيها خمس بدأت في الشارع وانتهت بموافقة اقرار قانون بمجلس الوزراء ولله الحمد ، لعل البعض يقول ان الدوائر الخمس لها عيوب ولا احد ينكر هذا لكن فوائد الدوائر الخمس لا تعد ولا تحصى ولا تقارن مع 25 دائره .
ابي اطلع عن موضوع الدوائر الخمس وبتكلم عن العنصر النسائي ذو الكفاءه عندنا بالكويت ..
شباب الكويت اذا تكاتفو واتحدو يسوون المستحييل صدقوني ..
ليش ما عندنا نائبه في المجلس !! معقوله ماكو مرشحه عندها الامكانيات اللي تأهلها وتفوزها بالانتخابات !!!!
انا اقولكم د.اسيل العوضي حضوضها هالمره قويه ، ففي انتخابات 2008 كانت اسيل قاب قوسين او ادنى من الفوز بالانتخابات لكن ما كتب لها رب العالمين ، وكانت من اشد المنافسين على المقعد لان شباب الكويت وبنات الكويت يبونها ، اي نعم يبونها توصل لانها خير من 50% من نواب المجلس التأزيميين والبعض الاخر ما يدري وين الله قاطه ..
شباب الكويت تكاتفو وقدرو يوصلون صالح الملا احد اكفأ الشباب الكويتي اللي وصل وحقق رقم قياسي من اول مره نزل فيه في الدائرة الثالثه وكسب سمعه طيبه مع فكر وطرح وطني راقي لا يهدف لاي مصلحه اخرى غير العمل لهذه الارض وبدون تأزيم وتعسف .